ਨਵੀਂ ਦਿੱਲੀ 30, ਜਨਵਰੀ (ਸਾਰਾ ਯਹਾ /ਬਿਓਰੋ ਰਿਪੋਰਟ): ਸ਼ੁਕਰਵਾਰ ਨੂੰ ਸਿੰਘੂ ਬਾਰਡਰ ਤੇ ਹੋਈ ਪੱਥਰਬਾਜ਼ੀ ਦੌਰਾਨ ਕੁਝ ਦਿਲ ਦਹਿਲਾਉਣ ਵਾਲੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ਤੇ ਤੇਜ਼ੀ ਨਾ ਵਾਇਰਲ ਹੋ ਰਹੀਆਂ ਹਨ।ਸੋਸ਼ਲ ਮੀਡੀਆ ਯੂਜ਼ਰਸ ਨੇ ਇਨ੍ਹਾਂ ਤਸਵੀਰਾਂ ਦੀ ਤੁਲਨਾ ਅਮਰੀਕਾ ਦੇ “ਜਾਰਜ ਫਲੋਈਡ” ਘਟਨਾ ਨਾਲ ਕੀਤੀ ਹੈ।ਲੋਕ ਸੋਸ਼ਲ ਮੀਡੀਆ ਤੇ #farmerslivesmatter ਹੈਸ਼ਟੈਗ ਨੂੰ ਫੈਲਾ ਰਹੇ ਹਨ।
ਸ਼ੁੱਕਰਵਾਰ ਨੂੰ ਸਿੰਘੂ ਸਰਹੱਦ ‘ਤੇ ਹਿੰਸਾ ਉਦੋਂ ਭੜਕ ਗਈ ਜਦੋਂ “ਸਥਾਨਕ” ਹੋਣ ਦਾ ਦਾਅਵਾ ਕਰਨ ਵਾਲੀ ਇੱਕ ਵੱਡੀ ਭੀੜ ਉਥੇ ਆ ਗਈ ਅਤੇ ਪ੍ਰਦਰਸ਼ਨਕਾਰੀ ਕਿਸਾਨਾਂ ਵਿਰੁੱਧ ਨਾਅਰੇਬਾਜ਼ੀ ਕਰਨ ਲੱਗੇ। ਉਹ ਵਿਰੋਧ ਪ੍ਰਦਰਸ਼ਨ ਵਾਲੀ ਥਾਂ ‘ਤੇ ਟੈਂਟਾਂ ਦੀ ਭੰਨਤੋੜ ਕਰਨ ਲੱਗੇ। ਸਥਿਤੀ ਕੰਟਰੋਲ ਤੋਂ ਬਾਹਰ ਹੋ ਜਾਣ’ ਤੇ ਪੁਲਿਸ ਨੇ ਦਖਲ ਦਿੱਤਾ।
ਇੱਕ ਯੂਜ਼ਰ ਵਲੋਂ ਸਾਂਝੀ ਕੀਤੀ ਗਈ ਇਸ ਫੋਟੋ ਵਿੱਚ, ਇੱਕ ਵਿਅਕਤੀ ਦੇ ਚਿਹਰੇ ਉੱਤੇ ਕਿਸੇ ਹੋਰ ਵਿਅਕਤੀ ਦੀ ਜੁੱਤੀ ਦਿਖਾਈ ਦੇ ਰਹੀ ਹੈ।
ਇੰਟਰਨੈੱਟ ਯੂਜ਼ਰਸ ਇਸ ਨੂੰ ਜਾਰਜ ਫਲੋਈਡ ਪਲ ਕਹਿ ਰਹੇ ਹਨ ਕਿਉਂਕਿ ਅਮਰੀਕਾ ਦੇ ਜਾਰਜ ਫਲਾਇਡ ਨਾਮ ਦੇ ਇੱਕ ਕਾਲੇ ਆਦਮੀ ਨੂੰ ਇੱਕ ਪੁਲਿਸ ਅਧਿਕਾਰੀ ਨੂੰ ਇਸੇ ਤਰ੍ਹਾਂ ਮੌਤ ਦੇ ਘਾਟ ਉਤਾਰ ਦਿੱਤਾ ਸੀ। ਪੁਲਿਸ ਨੇ ਉਸਦੀ ਗਰਦਨ ਨੂੰ ਗੋਡੇ ਨਾਲ ਦਬਾਅ ਦਿੱਤਾ ਸੀ ਜਿਸ ਮਗਰੋਂ ਉਸਦੀ ਮੌਤ ਹੋ ਗਈ। ਇਸ ਘਟਨਾ ਮਗਰੋਂ “ਬਲੈਕ ਲਿਵਜ਼ ਮੈਟਰ” ਅੰਦੋਲਨ ਭੜਕ ਗਿਆ ਸੀ।ਜਿਸ ਨਾਲ ਵਿਸ਼ਾਲ ਵਿਰੋਧ ਪ੍ਰਦਰਸ਼ਨ ਹੋਏ, ਜਿਸ ਵਿਚ ਅੰਦੋਲਨਕਾਰੀਆਂ ਨੂੰ ਪੁਲਿਸ ਫੋਰਸ ਵਲੋਂ ਮਹੱਤਵਪੂਰਨ ਧੱਕੇਸ਼ਾਹੀ ਦਾ ਸਾਹਮਣਾ ਕਰਨਾ ਪਿਆ।
ਦਿੱਲੀ ਪੁਲਿਸ ਦੇ ਐਸਐਚਓ (ਅਲੀਪੁਰ) ਪ੍ਰਦੀਪ ਪਾਲੀਵਾਲ ਸ਼ੁੱਕਰਵਾਰ ਨੂੰ ਵਧੇਰੇ ਹਿੰਸਾ ਨੂੰ ਰੋਕਣ ਦੀ ਕੋਸ਼ਿਸ਼ ਵਿੱਚ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਏ। ਹਾਲਾਂਕਿ, ਇਹ ਸਵਾਲ ਉਠਾਇਆ ਗਿਆ ਹੈ ਕਿ ਭਾਰੀ ਸੁਰੱਖਿਆ ਪ੍ਰਬੰਧਾਂ ਦੇ ਦੌਰਾਨ ਇਹ “ਸਥਾਨਕ” ਲੋਕ ਪ੍ਰਦਰਸ਼ਨਕਾਰੀ ਖੇਤਰ ਵਿੱਚ ਦਾਖਲ ਕਿੰਝ ਹੋਏ, ਅਤੇ ਟੈਂਟਾਂ ਦੀ ਭੰਨ ਤੋੜ ਕਰਦੇ ਹੋਏ ਅੰਦੋਲਨਕਾਰੀ ਕਿਸਾਨਾਂ ਤੇ ਲਾਠੀਆਂ ਕਿਵੇਂ ਵਰਾਉਣ ਲਗੇ?